Комсомольски тӑрӑхӗнчи пӗр ялта пурӑнакан хӗрарӑм ачисем умӗнче 2 миллиона яхӑн тенкӗлӗх алимент парӑмӗ пухса тултарнӑ. Тӗрӗсрех каласан, парӑм 1,8 миллион тенке ҫитсе кайнӑ.
Ултӑ ача амӑшне халӗ пуҫиле майпа явап тытарма йышӑннӑ. Унӑн юсанмалла ҫулталӑк ӗҫлеме тивӗ, ҫав вӑхӑтра тупӑшӑн 5 процентне патшалӑха тытса юлӗҫ.
36 ҫулти хӗрарӑм официаллӑ майпа ниҫта та ӗҫлемен, вӑхӑтлах вырнаҫса тупӑш курнине хӑйне валли тӑкакланӑ.
Чӑваш Енре коммунистсем каллех Сталин бюстне вырнаҫтарнӑ. Ку – тӑваттӑмӗш.
Хальхинче бюста Комсомольски округӗнчи Асанкасси ялӗнче Киров урамӗнчи 35-мӗш ҫуртӑн пахчинче вырнаҫтарнӑ. Хальхине те, унчченхисене те Н.К.Шемякин скульптор хатӗрленӗ. Тӑваттӑмӗш бюста шӑпах унӑн мӑшӑрӗн ашшӗ-амӑшӗ килӗ умӗнче лартнӑ. Арӑмӗн ашшӗ Тӑван ҫӗршывӑн Аслӑ вӑрҫинче пулнӑ, амӑшӗ – ӗҫ фрончӗн ветеранӗ, хисеплӗ колхозница.
Малтанхи 3 бюст ҫак тӑрӑхсенче вырнаҫнӑ: Канаш округӗнчи Вӑтапуҫра, Хӗрлӗ Чутай тӑрӑхӗнчи Хурапырта тата Вӑрнар округӗнчи Чарӑшкас Хирлеп ялӗнче.
Ҫитес вӑхӑтра республикӑра икӗ плотинӑна юсама палӑртнӑ. Гидроузелсене упраса хӑварни ял хуҫалӑхӗшӗн пӗлтерӗшлӗ.
Тӑвай округӗнчи Тӑрмӑш ялӗ ҫывӑхӗнчи пӗвене тата Комсомольски округӗнчи Кӗҫӗн Ҫӗрпӳелпе Йӑвашкел ялӗсен хушшинчи Кӗҫӗн Пӑла юханшывӗ ҫинчи плотинӑна юсӗҫ.
Ӗҫсене ҫитес вӑхӑтра тытӑнмалла.
«Старость в радость» (чӑв. Ватлӑх савӑнма) ыркӑмӑллах фончӗ Чӑваш Енре пурӑнакан ватӑсемпе сусӑрсене час-часах тӗрлӗ енчен пулӑшать. Хальхи вӑхӑтра вӑл вутӑ хутса пурӑнакан пӗччен ватӑсемпе сусӑрсене вутӑ туянса парать, килех илсе ҫитерсе парать.
Вутӑ та туянайман Каҫал тарӑхӗнчи 11 ҫынна пулӑшнӑ та ӗнтӗ. Тӳлевсӗр вутӑллӑ пулнисен йышӗнче Гельсинур Гилачетдиновна ятла хӗрарӑм та пур. Ырӑ ҫынсем килӗ умне касса-ҫурса хатӗрленӗ пӗр машина вутӑ илсе килсе пушатсан вӑл питех те савӑннӑ.
Паян Комсомольски округӗнче типӗ курӑк ҫуннӑ. Ку кӑҫал – пӗрремӗш тӗслӗх.
Округра Тури Тимӗрчкасси ялӗнче 150 тӑваткал метр лаптӑк ҫинчи типӗ курӑк ҫуннӑ. Пушара Инкеклӗ лару-тӑру министерствин 6 ӗҫченӗ 2 машинӑпа сӳнтернӗ. Юрать-ха, ҫынсен кил-ҫурчӗ шар курман.
Инкеклӗ лару-тӑру министерстви пӗлтернӗ тӑрӑх, ҫутҫанталӑк пушарӗсен 90 проценчӗ ҫын айӗпӗпе пулать.
Шупашкарти Трактор тӑвакансен культура керменӗнче пуш уйӑхӗн 22-мӗшӗнче Пӗтӗм Раҫҫейри хор фестивалӗн регионти тапхӑрӗ иртӗ.
Унта Элӗк, Патӑрьел, Вӑрнар, Йӗпреҫ, Канаш, Куславкка, Комсомольски, Красноармейски, Хӗрлӗ Чутай, Сӗнтӗрвӑрри, Муркаш, Ҫӗрпӳ, Шупашкар, Ҫӗмӗрле, Етӗрне, Елчӗк тӑрӑхӗсенчи, Улатӑр, Канаш, Ҫӗнӗ Шупашкар, Шупашкар тата Ҫӗмӗрле хулисенчи 59 вокалпа хор коллективе хутшӑнӗ.
Республикӑра чӗрчунсене урнӑ чиртен вакцинаци тӑвас ӗҫ пырать. Кун пирки Патшалӑх ветеринари служби пӗлтернӗ.
Кӑрлач-нарӑс уйӑхӗсенче 58 пин ытла чӗрчуна прививка тунӑ. Вӗсен йышӗнче 34,7 пинӗшӗ – выльӑх, 23,6 пинӗшӗ – йытӑ-кушак. Кунсӑр пуҫне республикӑра 48 тӗвене прививка тунӑ.
Урнӑ чир сарӑлнине пула Комсомольски, Пӑрачкав округӗсенче тата Шупашкарта карантин пулнине палӑртнӑ.
2030 ҫул тӗлне Комсомольски районӗнче транспортпа логистикӑн пысӑк комплексне хута яма палӑртаҫҫӗ. Вӑл «Хӗвелтухӑҫ» М-12 ҫул ҫинче пулӗ.
Чӑваш Енӗн экономика аталанӑвӗн тата пурлӑх хутшӑнӑвӗсен министре Дмитрий Краснов Телеграмра пӗлтернӗ тӑрӑх, проекта 290 миллиона яхӑн тенкӗ укҫа хывӗҫ. Логистика центрӗ тӗрлӗ пулӑшу кӳрӗ, ҫав шутра тавара турттарса килсе упрассипе те.
Комсомольски округӗнчи Вӑрманхӗрри Чурачӑк ялӗнче карантин тесе палӑртнӑ. Ку – тилӗ виллине пула.
Ӑна экспертизӑна панӑ, унти специалистсем тилӗ урнӑ чирпе чирлӗ пулнине ҫирӗплетнӗ.
Ветеринарсем чир ан сарӑлтӑр тесе выльӑх-чӗрлӗхе вакцинаци тӑваҫҫӗ. Халӗ ялта чӗрчунсемпе ҫыхӑннӑ ярмӑрккӑсем ирттерме, суту-илӳ тума икӗ уйӑх юрамасть.
Чӑваш Республикипе ӗҫлекен Россельхознадзор управленийӗ хыпарланӑ тӑрӑх, «Центр» ТМЯП ӗҫӗнче кӑлтӑксем тупнӑ.
Аса илтеретпӗр, нарӑсӑн 4-мӗшӗнче Кӳкеҫ лицейӗнче ачасем наркӑмӑшланнӑ: пӗрине пульницӑна хунӑ, ултӑ ачан килте сипленме тивнӗ. Лицейри ачасене вӗри апатпа «Центр» ТМЯП тивӗҫтерни паллӑ.
Ҫакӑн хыҫҫӑн тӗрӗслев органӗсем хӑйӗн ӗҫне пуҫӑннӑ. Чӑваш Республикипе ӗҫлекен Россельхознадзор управленийӗ «Меркурий» ФГУП урлӑ иртекен электронлӑ хутсене тӗрӗсленӗ те 2025 ҫулхи кӑрлачӑн 13-мӗшпе 20-мӗшӗнче Кӳкеҫри лицея 177 килограмм аш кӳрсе килнине (ӑна Комсомольски тӑрӑхӗнчи Зарифзянов И.Р. фермер хуҫалӑхӗнче туса илнӗ, Соловьев Н.М. усламҫӑ тирпейленӗ) асӑрханӑ. Ку аша «Proteus йӑхӗнчи бактерисем» кӑтарту тӗлӗшӗнчен тӗрӗслемен иккен.
Ҫапла май, апат-ҫимӗҫпе тивӗҫтерекен «Апат-ҫимӗҫ продукцийӗн хӑрушсӑрлӑхӗ» техника регламенчӗ ыйтнине пурнӑҫламан. Ҫакӑншӑн айӑплисен явап тытма тивӗ.
+15.3 °C